Імя Тваё, о, Іісус!

Імя Тваё я ў сэрцы паўтараю,
Я п’ю яго, як сьвежую расу.
Як водар кветак сладаснага раю,
Імя Тваё, о, Іісус!

Імя Тваё – ялей на нашы раны,
Як скарб каштоўны, я яго нясу. 
Як пасьля ночы цёмнай сьветлы ранак,
Імя Тваё, о, Іісус!

Імя Тваё – надзея і збаўленьне,
Імя Тваё – і міласьць нам, і суд.
І вартае хвалы і пакланеньня
Імя Тваё, о, Іісус!

Імя Тваё пакрые грэх і сорам,
Напоўніць сэрца наш пусты сасуд,
Дасьць суцяшэньне нам у нашым горы,
Імя Тваё, о, Іісус!

Імя Тваё – наш шлях у Горад вышні,
Дзе нам Айцец сатрэ з вачэй сьлязу,
І на чале нам кожнаму напіша, 
Імя Тваё, о, Іісус!